Хятадын хойд зүгт байрлах нэгэн үйлдвэрт дэлбэрэлт болж, хоёр хүний амь үргэджээ. Мөн 84 хүн бэртэл авч, таван хүн ор сураггүй байгааг тус улсын төрийн хэвлэлд мэдээлэв. Тодруулбал, ӨМӨЗО-ны Баоган Юнайтед Гангийн үйлдвэрт өчигдөр (2026.01.18) орон нутгийн цагаар 15:00 цагт дэлбэрэлт болж, ойр орчимд мэдэгдэхүйц чичиргээ үүсгэжээ. Цахим сүлжээнд нийтлэгдсэн видео бичлэгт дэлбэрэлтийн улмаас утаа униар их хэмжээгээр тархаж буйг харуулсан бөгөөд үйлдвэрийн нурсан тааз, хоолой зэрэг газраар нэг тархсан байв. Бэртэл авсан 80 гаруй хүний тавынх нь биеийн байдал маш хүнд байгаа бөгөөд эрх баригчид дэлбэрэлтийн учир шалтгааныг тодруулахаар ажиллаж байна.
Баоган Юнайтед Гангийн үйлдвэр нь төрийн өмчит бөгөөд улсдаа томоохонд тооцогддог. Хятад улсад үйлдвэрийн дэлбэрэлт, уурхайн нуралтаас эхлээд шаварлаг хөрсний гулсалт хүртэл үйлдвэрлэлийн осол, хэрэг гарах нь олон. Тяньжин боомтод 2015 онд болсон хоёр удаагийн томоохон дэлбэрэлтийн улмаас 173 хүн амиа алдаж, хэдэн зуун хүн гэмтэж, хотын томоохон хэсгүүд сүйрч байжээ. Өнгөрсөн оны тавдугаар сард зүүн зүгийн Шаньдун мужийн химийн үйлдвэрт дэлбэрэлт болж таван хүн амиа алдаж, дор хаяж 19 хүн шархадсан байдаг.