УИХ-ын гишүүн, Монгол Улсын сайд, Боомтын сэргэлтийн Үндэсний хорооны дарга Х.Булгантуяа Бүгд Найрамдах Буриад Улсын Тэргүүн, Засгийн газрын дарга Алексей Самбуевич Цыденовтой уулзлаа.
Бүгд Найрамдах Буриад Улсын тэргүүн А.С.Цыденов “хоёр улсын хил орчмын бүс нутаг, цаашлаад улс хоорондын эдийн засгийн харилцаа хамтын ажиллагааг хөгжүүлэхэд энэ удаагийн уулзалт өндөр ач холбогдолтой. Зөвхөн бүс нутаг, хилийн асуудал хэлэлцээд зогсохгүй эрүүл мэнд, боловсрол, тээвэр логистик гээд өргөн хүрээний харилцаа хамтын ажиллагааг хөндмөөр байна. Буриад Улсын засгийн газар Монгол Улстай соёл урлаг, аж үйлдвэрлэл, боловсрол, барилга гээд олон салбарт хамтран ажиллах чин эрмэлзэлт бий.
Цар тахлын амаргүй үед Алтанбулагийн боомтын бүтээн байгуулалтыг богино хугацаанд өрнүүлж, нэвтрэх хүчин чадлыг нэмэгдүүлж чадлаа. Хил гаалийн үйл ажиллагаа хялбаршуулахад анхаарч байгаа төдийгүй харилцан ашигтай экспорт, импортыг хөгжүүлэх нь чухал байна” гэв.
Уулзалтын үеэр Монгол Улсын сайд, Боомтын Сэргэлтийн Үндэсний хорооны дарга Х. Булгантуяа “Монгол улс сайн хөршийн харилцааг эрчимтэй хөгжүүлэх, өргөжүүлэхэд онцгой анхаардаг. Монгол Улсын Засгийн газраас эдийн засгаа тэлэх, олон улсын хамтын ажиллагааг өргөжүүлэх үүднээс ”Боомтын сэргэлт”-ийн бодлогогыг тусгайлан хэрэгжүүлж байна. Цар тахлын амаргүй үед Монгол Улстай хил залгаа боомтуудын бүтээн байгуулалтыг өрнүүлсэн нь хоёр талын худалдаа эдийн засаг, аялал жуулчлалыг хөгжүүлэхэд чухал түлхэц болсон.
Монгол Улсын Засгийн газраас 2023 оныг “ Монголд зочлох жил” болгон зарласан. Энэ ажлын хүрээнд зөвхөн ОХУ –аас л гэхэд 200-250 мянган жуулчин хүлээн авахаар тооцсон. Аялал жуулчлалын хамгийн гол бүс нутаг бол Буриад. Гол боомт нь Алтанбулаг юм. Тиймээс энэ боомтын бүтээн байгуулалтын ажилд онцгойлон анхаарч, хоёр талын хил, гаалын үйл ажиллагааг хүнд сурталгүй , түргэтгэх тал дээр ч идэвхтэй хамтын ажиллагааг өрнүүлэх шаардлага байна“ гэв.
Уулзалтын төгсгөлд бүс нутаг, хил орчмын хамтын ажиллагааг идвэхжүүлэхэд хоёр тал идэвхитэй хамтран ажиллахаа илэрхийллээ.
