Францын хэт барууны үзэлтэй 56 настай, улстөрч эмэгтэй Марин Ле Пенийг тус улсын шүүхээс Европын холбооны санхүүжилтийг шамшигдуулж, зориулалтын бусаар зарцуулсан хэрэгт буруутгаж, түүнд 4 жилийн хорих ял оноох шийдвэрийг өчигдөр гаргалаа. Түүнд оноосон ялын хоёр жилийг нь тэнсэн харгалзах ялаар сольж, үлдсэн хоёр жилд нь цахим гав зүүж зорчих эрхийг нь хязгаарлаж, 100,000 еврогийн торгууль ногдуулахаар болсон.
Үүнээс гадна шүүхээс гаргасан нэгэн сонирхолтой шийдвэр нь Марине Ле Пенийг таван жилийн хугацаанд сонгуульд нэр дэвших эрхийг нь түдгэлзүүлсэн явдал байв. Энэ нь түүний хувьд 2027 оны Францын Ерөнхийлөгчийн сонгуульд өрсөлдөж чадахгүй байдалд хүргэж байна. Ле Пен 2017 болон 2022 оны Ерөнхийлөгчийн сонгуульд Макронтой хүчтэй өрсөлдөж ялагдаж байсан түүхтэй.
Харин Марине Ле Пен шүүхийн шийдвэрийг эрс эсэргүүцэж, давж заалдахаа мэдэгдлээ.
Тэрээр өчигдөр хэлсэн үгэндээ сая сая францууд шүүхийн шийдвэрийг эгдүүцэн хүлээн авч байна. Энэ улсад дарангуйлал тогтооход зориулсан алхам хийхэд шүүгчид оролцож байна гэж хэлжээ.
Шүүхийн шийдвэртэй холбоотой АНУ-ын Ерөнхийлөгч Трамп байр сууриа илэрхийлэхдээ түүний 2024 оны сонгуулийн үеэр болон сонгуулийн өмнөх хууль хяналтын байгууллагаар дамжуулж эсрэг намын зүгээс явуулж байсан үйлдэл нь Францад Ле Пений эсрэг явуулж байгаа үйлдэлтэй ижил гэдгээр харьцуулсан байна. Трамп болон Ле Пен нар нь үндэсний үзэл, цагаачлалын асуудлаар ижил төстэй улс төрийн бодлого баримталдаг улс төрчид юм. Трамп 2022 оны Францын ерөнхийлөгчийн сонгуулиар хэн нэгэн нэр дэвшигчийг албан ёсоор дэмжээгүй ч Ле Пенийг магтаж, түүний бодлогыг үнэлж байжээ.
Мөн Францын шүүхийн шийдвэрийг Трампын ахлах зөвлөх, АНУ-ын засаг захиргааны үр ашигтай байдлыг хангах албыг удирдаж буй тэрбумтан Илон Маск эсэргүүцэж байгаагаа өөрийн X сүлжээгээр дамжуулж илэрхийлэв. Тэрээр зүүний үзэлтнүүд ардчилсан сонгуулиар ялалт байгуулж чадахгүй болоод ирэхээрээ хууль эрх зүйн тогтолцоог ашиглаж, өрсөлдөгчөө шоронд хорьдог нь дэлхий даяар тогтсон жишиг юм гэж Марине Ле Пенийг дэмжиж байгаагаа илэрхийлжээ.
