БНСУ-ын Үндсэн хуулийн цэц 4 дүгээр сарын 4 ний өдөр ерөнхийлөгч Юн Сок Ёолыг огцруулах эсэхээр эцсийн шийдвэр гаргалаа. Тухайлбал өнгөрөгч 12 дугаар сарын эхээр улс орон даяар үндэслэлгүйгээр цэргийн онц байдал тогтоох шийдвэр гаргасан шалтгаанаар Юн Сок Ёолын бүрэн эрхийг 12 дугаар сарын 14 ний өдөр БНСУ-ын Парламент түдгэлзүүлсэн. Ингээд түүний огцрох эцсийн шийдвэрийг хуулийн дагуу Үндсэн хуулийн цэц гаргах ёстой. БНСУ-ын Үндсэн хуулийн цэц нийт 9 гишүүнтэй одоогоор 8 нь үүрэгт албан тушаалаа хашиж байгаа бөгөөд хуулиар Ерөнхийлөгчийг огцруулахын тулд гуравны хоёрын санал авсан байх шаардлагатай. Хэрэв гишүүдийн гуравны хоёр Ерөнхийлөгчийг огцруулахыг дэмжээгүй үед тэрээр үүрэгт албан тушаалаа үргэлжлүүлэн хаших ёстой. Харин Баасан гаригийн өглөө болсон цэцийн хуралдаанаар цэцийн 8 гишүүд бүгд санал нэгтэй Юн Сок Ёолыг огцрох нь зүйтэй гэж үзлээ. Цэцийн эцсийн шийдвэрийг Үндсэн хуулийн цэцийн гишүүн Moon Hyung-bae уншиж танилцуулснаар тус шийдвэр даруй хүчин төгөлдөр болж, БНСУ-д 60 хоногийн дотор дараагийн ерөнхийлөгчийг сонгох ээлжит бус ерөнхийлөгчийн сонгууль явуулах шаардлагатай болж байна. Энэ нь юу гэсэн үг вэ гэхээр ирэх 6 сарын 3 гэхэд БНСУ-ын шинэ ерөнхийлөгч тодорсон байна гэж ойлгож болно. Юн Сок Ёолын хувьд 2022 оны 5 сарын 10 аас 2025 оны 4 сарын 4 ийг хүртэл БНСУ-ын 13 дахь ерөнхийлөгчөөр ажилласан гэж түүхэнд үлдэж байгаа ч бүрэн эрхээ дуусгаж чадаагүй огцорч байгаа нь тус улсын 11 дэх Ерөнхийлөгч Пак Ген Хэгийн түүхийг дахин давтсан үйлдэл боллоо. Түүнээс гадна Юн Сок Ёол хууль эрх зүйн ямар хариуцлага хүлээх вэ гэдэг хүлээлт дагуулж байна. Онц байдал зарласныхаа төлөө тэрээр бүх насаараа ч хоригдох боломжтой болоод байгаа юм. Эрх баригч Иргэний хүчний нам шүүхийн шийдвэрийг хүлээн зөвшөөрч байгаагаа мэдэгдсэн бол сөрөг хүчин Ардчилсан энэ үйл явдал нь “ард түмний ялалт” байлаа хэмээн цэцийн шийдврийг талархан хүлээн авч байгаа илэрхийлж байна. БНСУ-ын нийгэмд түүнийг огцрох ёстой гэж үзэж түүний үйлдлийг хатуу эсэргүүцэж байгаа ч хүмүүс бий мөн түүнийг дэмжиж улс төрийн зорилгоор Ардчилсан намыг асуудлыг хурцатгасан гэж үзэж буй олон ч дэмжигч нар байна. Тийм учраас нийгэмд эмх замбараагүй байдал үүсэхээс урьдчилан сэргийлэх арга хэмжээг хууль сахиулах, дотоодын аюулгүй байдлын асуудал хариуцсан байгууллагуудын зүгээс өндөр түвшинд хангаж, хамгаалалтыг чангаруулаад байна. Тухайлбал цагдаа нар Үндсэн хуулийн шүүхийн эргэн тойронд 100 метрийн радиусыг хамарсан талбайг хамгаалалтад авч, хамгаалалтад авсан энэ бүсэд жагсаал цуглаан хийхийг хориглож, олон нийтийг нэвтрүүлэхгүй байх, замын хөдөлгөөнийг хааж, хэрэв жагсаал цуглаан болсон тохиолдолд жагсаалыг сайтар хянаж, хамгаалалтаа чангатгахаар болжээ. Ялангуяа Үндсэн хуулийн шүүх болон Ерөнхийлөгчийн ордны ойр орчмын олон нийт ихээр цуглардаг газрууд болон сургуулиудыг үйл ажиллагааг хаагаад байна. Мөн цагдаагийн байгууллага Үндсэн хуулийн цэцийн бүх гишүүдийн орон байрыг бүрэн хамгаалалтад авч, тэдний аюулгүй байдлыг хангаж ажилласан байна. Нөхцөл байдалтай уялдуулж улс орон даяар 20 мянга орчим цагдаагийн албан хаагчдыг дайчилагдан ажиллаж байгаа бөгөөд тэдгээрийн 70 хувь нь буюу 14 мянга орчим цагдаагийн бие бүрэлдэхүүн Сөүл хотод ажиллаж байгаа гэдгийг холбогдох албаныхан мэдээлжээ.
Эх сурвалж: https://en.yna.co.kr/view/AEN20250403008554315?section=national/politicsen.yna.co.kr