Монгол Улсын Ерөнхийлөгч У.Хүрэлсүх Саксони муж улсад айлчиллаа

Монгол Улсын Ерөнхийлөгч Ухнаагийн Хүрэлсүх Холбооны Бүгд Найрамдах Герман Улсад хийж буй төрийн айлчлалынхаа хүрээнд Саксони мужид айлчилсан байна. Ерөнхийлөгч У.Хүрэлсүхийг Лайпциг хотод хүрэлцэн ирэхэд Саксони муж улсын Засгийн газрын Хэрэг эрхлэх газрын дарга, Холбооны болон Европын асуудал эрхэлсэн Төрийн нарийн бичгийн дарга Андреас Хандшү, Лайпциг хотын Тэргүүн орлогч дарга Торстен Бонев тэргүүтэй төлөөлөгчид угтан авчээ.  Ерөнхийлөгч У.Хүрэлсүх Саксони муж улсын Хүндэт зочны дэвтэр болон Лайпциг хотын “Алтан ном”-д дурсгалын үг бичиж, гарын үсэг зурсан байна. Монгол Улсын Ерөнхийлөгч У.Хүрэлсүхэд Саксони муж улсын Засгийн газрын Хэрэг эрхлэх газрын дарга Андреас Хандшү бараалхжээ. Уулзалтын үеэр Ерөнхийлөгч У.Хүрэлсүх Холбооны Ерөнхийлөгчийн урилгаар хийж буй төрийн айлчлалын хөтөлбөрт Саксони муж улсад онцгойлон айлчилж байгаа нь Монгол, Саксони муж улс нэгэн зууны түүхэн уламжлалтай болохыг дурдав.

Тухайлбал, 1926 онд манай их зохиолч Дашдоржийн Нацагдорж тэргүүтэй анхны 30 гаруй монгол залуу эрдэм сурахаар Герман Улсыг зорьж, манай шинэ үеийн сэхээтнүүд болон бэлтгэгдэж, орчин цагийн Монгол Улсыг цогцлоон хөгжүүлэхэд үнэтэй хувь нэмэр оруулсан түүхтэй. Уулзалтаар Ерөнхийлөгч У.Хүрэлсүх, муж улсын Засгийн газрын хэрэг эрхлэх газрын дарга А.Хандшү нар Монгол, Германы Стратегийн түншлэлийн харилцааг Холбооны түвшинд төдийгүй, муж улсуудтай хөгжүүлж буй бодит хамтын ажиллагаагаар баяжуулах нь чухал гэдгийг тэмдэглэв.

Хоёр талын энэхүү түүхэн уламжлал өнөөг хүртэл үргэлжилж, эдүгээ 700 гаруй оюутан Германд суралцаж байгаа бөгөөд Монгол Улсын Ерөнхийлөгчийн санаачилсан “Илгээлт-2100” тэтгэлэгт хөтөлбөрийн хүрээнд 126 оюутан Дрездений техникийн их сургуульд суралцаж байна. Мөн “Монгол ба монголын дараах үеийн Евро-Ази дахь соёлын солилцоо, байгаль орчин” сэдэвт олон улсын эрдэм шинжилгээний хурлыг “Хумбольдт”-ын их сургуульд, их зохиолч Д.Нацагдоржийн мэндэлсний 120 жилийн ойд зориулсан эрдэм шинжилгээний олон улсын бага хурлыг “Лайпциг”-ийн их сургуульд тус тус зохион байгуулж байгааг сайшаан тэмдэглэв.

Монгол Улсын Боловсрол, шинжлэх ухааны яам, Саксони муж улсын Шинжлэх ухаан, соёл, аялал жуулчлалын яам хооронд 2023 оны арваннэг дүгээр сард дээд боловсролын салбарын хамтын ажиллагааны тухай хамтарсан тунхаглалыг байгуулсан бөгөөд тус муж улсын Боловсрол, шинжлэх ухааны төлөөлөгчийн газар 2024 оны долдугаар сараас Улаанбаатарт үйл ажиллагаагаа явуулж байна. Саксони муж улс нь дөрвөн сая хүн амтай, микроэлектроник, хагас дамжуулагч, мэдээллийн технологи, автомашин, тоног төхөөрөмжийн үйлдвэрлэлээрээ онцлог бөгөөд Дрезден, Лайпциг хотод их, дээд сургууль, судалгааны байгууллага төвлөрдөг байна.