Монгол Улсын Соёлын Гавьяат зүтгэлтэн, Морин хуур, Монгол хөгжмийн зэмсэг урлалын мастер, Монгол өв соёлоо түгээн дэлгэрүүлэгч, Өмнөговь аймгийн Цогт-Овоо сумын уугуул Пүрэвдаваагийн Байгалжав 2023 оны усан туулай жилийн Өмнөговь аймгийн “ХҮНДЭТ ИРГЭН” хэмээх эрхэм хүндтэй шагналыг хүртсэн билээ.
16 настайдаа анхны хуураа урлаж байсан П.Байгалжав нь 1991 оноос хойш тасралтгүй хөгжим үйлдвэрлэж, “Эгшиглэн Магнай” ХХК байгуулж, эдүгээ зөвхөн морин хуурыг гэхэд л 50000 ширхэгийг урлан, үндэсний бүх гайхамшигт хөгжмүүдийг ур ухаан авъяас чадвараа шингээн бүтээсэн соёлын өв тээгч билээ.
Монголын томоохон театруудын төдийгүй, “The Hu”хамтлагийн хөгжмийг урласан мөн олон ховор сонин хөгжмийн цуглуулгатай гайхалтай уран бүтээлч бахархалт хүмүүн юм.