Өнгөрөгч өдрүүдэд дэлхийн дахины гол анхаарлын төвд орж, хамгийн чухал сэдэв болоод байсан Трампын татварын бодлого хэрэгжиж эхлэхэд бэлэн болсон байна.
Трамп өчигдөр Цагаан ордонд хийсэн мэдээлэлдээ “Америкийг дахин баян улс болгоцгооё. Миний бие дэлхийн бусад улс орнуудтай харилцан адилаар, тэдний эсрэг харилцан татвар ногдуулах түүхэн зарлигт гарын үсэг зурж байна. Бусад улсууд АНУ-ын бараа бүтээгдэхүүнд өндөр гаалийн татвар тогтоож байгаа учраас бид ч гэсэн үүнийг хийх цаг болжээ. Энэ бол ердөө л ийм энгийн зүйл” гэж хэлжээ.
АНУ-д гадаад улс орнуудаас худалдаалагдах бараг бүх бараа, бүтээгдэхүүнд 10 хувийн ердийн тариф тогтоож, дэлхийн 100 орчим улс орнуудад 10 хувийн ердийн тариф оногдуулж, эдгээр улс орнуудын жагсаалтыг танилцууллаа.
Америкд их хэмжээний худалдааны алдагдал үүсгэдэг улс орнуудад илүү өндөр гаалийн татвар ногдуулах Цагаан Ордны шинэ тэргүүн Дональд Трампын шийдвэр өчигдөр буюу 4 дүгээр сарын 2-ны өдөр танилцуулагдсанаар АНУ -аас зах зээл, худалдааны хувьд ихээхэн хамааралтай, Вашингтоны гол худалдааны түншүүдэд томоохон цохилт болж байна. Ялангуяа Ази, Европын үйлдвэрлэл, худалдаа, экспортод Трампын татварын бодлого хүчтэй сөрөг нөлөө үзүүлэх бодит эрсдлийг дагуулахад хүрнэ гэж зах зээл шинжээчид харж байна.
Трампын 10 хувийн “ердийн гаалийн татвар” тогтоох шийдвэр нь 4 дүгээр сарын 5 ны өдрөөс хэрэгжиж эхэлнэ. Трампын 10 хувийн ердийн тариф тогтоосон улсуудын жагсаалтад тухайлбал Их Британи, Сингапур, Бразил, Австрали, Шинэ Зеланд,Турк, Колумби, Аргентини, Сальвадор, Арабын Нэгдсэн Эмират болон Саудын Араб улс багтсан байна. Манай Монгол улс энэ ангилалд багтсан байна.
Харин АНУ-ыг худалдааны их хэмжээний алдагдалд оруулж тэнцвэртэй биш худалдаа хийдэг дараах улс орнуудад илүү их хэмжээний гаалийн татвар ноогдуулахаар боллоо. Үүнд
Европын холбоо-20%, Хятад-54%, Вьетнам-46%, Тайланд-36%, Япон-24%, Камбож-49%, Өмнөд Африкийн БНУ -30%, Тайвань-32% -ийн импортын татварыг АНУ-д төлөхөөр болж байна. Энэ шийдвэр 4-р сарын 9-ний өдрөөс эхлэн хэрэгжиж эхлэх юм байна.
Эх сурвалж:https://www.cnbc.com/2025/04/02/trump-tariffs-live-updates.html
https://www.bbc.com/news/articles/c1jxrnl9xe2o