18 нас хүрээгүй иргэн электрон болон бусад төрлийн тамхи биедээ авбал 25 сая төгрөгөөр торгуулж, 6 сар хүртэл хорих ял шийтгэнэ
БНХАУ-ын Засаг захиргааны онцгой бүс Хонконгийн Засгийн газар “Тамхины хяналтыг чангатгах тухай” хуульд нэмэлт өөрчлөлт оруулж, 2025 оны 9 дүгээр сарын 19-ний өдрөөс мөрдөж эхэлсэн.
Уг нэмэлтэд тамхины албан татвар төлөхөөс зайлсхийхтэй холбоотой гэмт хэрэгт оногдуулах торгуулийн дээд хэмжээг 2 сая хонконг доллар /1 тэрбум орчим төгрөг/, хорих ялын дээд хэмжээг 7 хүртэл жил болгон нэмэгдүүлж тусгажээ.
Түүнчлэн 18 нас хүрээгүй иргэн электрон болон бусад бүх төрлийн тамхи биедээ авч, хилээр нэвтрэх хориотой. Зөрчсөн тохиолдолд 50,000 хонконг доллар /25 сая орчим төгрөг/ хүртэл хэмжээгээр торгох, 6 сар хүртэл хугацаагаар хорих ял шийтгэнэ.
Харин 18 болон түүнээс дээш насны иргэд биедээ Хонконгийн хуулийн дагуу зөвхөн задалсан 1 хайрцаг буюу 19 ширхэг янжуур, эсвэл 1 ширхэг навчин тамхи, гаансны болон дүнс зэрэг бусад төрлийн тамхи 25 хүртэл граммыг тээвэрлэхийг зөвшөөрдөг.
Duty Free буюу татваргүй барааны дэлгүүрээр үйлчлүүлэх тохиолдолд уг журам мөн адил үйлчлэх бөгөөд тогтоосноос илүү тоо, хэмжээгээр тамхи худалдаж авч болохгүй юм.
Дээр дурдсанаас илүү тоо, хэмжээгээр биедээ болон ачаа, тээшиндээ тамхи тээвэрлэж явах тохиолдолд энэ тухай гаалийн мэдүүлгийн хуудаст заавал тусгаж, зохих хэмжээний татварыг зайлшгүй төлөхийг анхаарна уу. /1 ширхэг янжуур тамхинд төлөх татвар 3.3 хонконг доллар буюу 1650 орчим төгрөг/
Иймд Хонконгийн хилээр зорчиж буй иргэдэд консулын газраас анхаарууллаа.