Хөгжлийн банкнаас банкны хэвийн үйл ажиллагаанд сөргөөр нөлөөлж, төр, нийтийн ашиг сонирхолд хохирол учруулж буй 26 чанаргүй зээлийг танилцуулав. Эдгээр зээлийг шүүхээр шийдвэрлүүлэхээр нэхэмжлэл гаргажээ.
26 чанаргүй зээл, активын мэдээлэлд зээлийн зориулалт, зээл, актив хөрөнгийн талаарх мэдээлэл, шүүх, шийдвэр гүйцэтгэлийн шатууд дахь мэдээлэл багтсан байна.
Нийт 74 зээл олгосноос 53 хувь нь чанаргүй зээл болжээ.
Хөгжлийн банкийг 2011 онд байгуулж, том үнийн дүнтэй цөөн тооны зээлийг санхүүжүүлсэн. Энэ үндсэн үүргийнхээ хүрээнд нийт 74 зээл олгосноос 53 хувь нь чанаргүй зээл болжээ. Монголбанкнаас тус банканд хийсэн шалгалтын дараа дээрх дүгнэлтэд хүрсэн байна.
“Энэ нь Хөгжлийн банк өнгөрсөн хугацаанд буруу ажилласныг харууллаа. Хугацаа хэтэрсэн, чанаргүй зээлүүдээ цэгцлэх шаардлагатай. Шүүхэд хэд хэдэн хэргийг шилжүүлсэн ч хугацаа их шаарддаг” гэж тус банкны захирал Н.Мандуул хэлэв.
Хамгийн сүүлд буюу өнгөрсөн баасан гарагт Хөгжлийн банкны томоохон зээлдэгчдийн нэг болох “Кью Эс Си” ХХК-тай холбоотой шийдвэрийг Дээд шүүхээс гаргасан.
Тус компанийн үндсэн зээлийн үлдэгдэл, үндсэн хүүгийн үлдэгдэл, нэмэгдүүлсэн хүүгийн үлдэгдлийн нэхэмжлэлийн шаардлагыг бүхэлд нь хангаж, нэхэмжлэл гаргасан үеийн ханшаар буюу нийт 192.5 тэрбум төгрөгийг Хөгжлийн банканд олгуулах шийдвэр гарсан юм.
ХӨГЖЛИЙН БАНКНААС ШҮҮХЭЭР ШИЙДВЭРЛҮҮЛЭХЭЭР НЭХЭМЖЛЭЛ ГАРГАСАН ЧАНАРГҮЙ ЗЭЭЛҮҮД
1. “КЬЮ ЭС СИ” 203 ТЭРБУМ төгрөгийн зээл авсан. “Уул уурхай, металлургийн цогцолбор байгуулах” төслийн хүрээнд Хандгайт өртөөнөөс Төмөртэйн уурхай хүртэл 33.4 км урт төмөр зам, ачиж, буулгах терминал барих ажлыг санхүүжүүлэх зориулалтаар 2014 онд Хөгжлийн банктай зээлийн гэрээ байгуулсан.
2015 оны арван хоёрдугаар сард гэрээний нэмэлт, өөрчлөлтөөр 71.3 сая ам.долларын зээлийг авч, зээлийн гэрээгээр 2018 оны арван хоёрдугаар сард зээлээ төлж дуусгах заалттай байв. Үндсэн зээлийн үлдэгдэл, үндсэн хүүгийн үлдэгдэл, нэмэгдүүлсэн хүүгийн үлдэгдлийн нэхэмжлэлийн шаардлагыг бүхэлд нь хангаж, нэхэмжлэл гаргасан үеийн ханшаар буюу нийт 192 тэрбум төгрөгийг Хөгжлийн банканд олгуулахыг Улсын дээд шүүх энэ сарын 14-нд шийдвэрлэсэн юм.
Тус компанийн захирлаар Э.Шижир ажилладаг.
2. “ТӨРИЙН ОРОН СУУЦНЫ КОРПОРАЦ”, “НЬЮ ЯАРМАГ ХАУСИНГ ПРОЖЕКТ” КОМПАНИ ХАМТРАН 142 ТЭРБУМ төгрөгийн зээл авсан. 2015 онд “Шинэ Яармаг” орон сууцны хороолол барихаар зээл авчээ. 59 тэрбум төгрөгийг эргүүлэн төлж, одоо 117 тэрбум төгрөгийн зээлийн үлдэгдэлтэй. Зээл төлөлт 56 сараар хойшилсон тул 2019 онд Чингэлтэй дүүргийн Иргэний хэргийн анхан шатны шүүхэд нэхэмжлэл гаргажээ.
ТОСК-аас 24 тэрбум , “НЯХП” компаниас 61 тэрбум төгрөг тус тус гаргуулах анхан шатны шүүхийн шийдвэр 2020 онд гарсан. Давж заалдах шатны шүүх хурал гурван сарын дараа болж, анхан шатны шүүхийн шийдвэрийн мөнгөн дүнд өөрчлөлт ороогүй, хууль хэрэглээний нэмэлт өөрчлөлт оруулжээ. Дээд шүүхийн шүүгчдэд энэ хэргийг хуваарилаагүй байдалтай байна. “Нью яармаг хаусинг прожект” ХХК, “Монголиан пропертийз инвестмент холдинг” Пде.Лтд, “Юнайтэд прожектс групп” ХХК нарын итгэмжлэгдсэн төлөөлөгч Улсын Дээд Шүүхэд хяналтын журмаар гомдол гаргажээ.
“Эрэл”-ийн Байшин үйлдвэрлэх комбинатын нээлт
3. “ЭРЭЛ” КОМПАНИ 2013 ОНД 104 ТЭРБУМ төгрөгийн зээлийг угсармал орон сууц барихаар авсан. 2013, 2014 онд хоёр удаа зээл авч, 26 тэрбум төгрөг төлжээ. Гэвч зээлийн нийт үлдэгдэл 163 тэрбум төгрөг байна. Тус компанийн банканд үлдээсэн барьцаа хөрөнгийг 83 тэрбум төгрөгөөр үнэлжээ. Зээлийн хугацаа хэтрэлт 91 сар болсон тул Хан-Уул дүүргийн Иргэний хэргийн анхан шатны шүүхэд 2020 оны аравдугаар сард ханджээ. Шүүх хурал таван удаа хойшилж, Хөгжлийн банк 161.9 тэрбум төгрөгийг тус компаниас шаардаж байна.
4. “МОНГОЛ ДРАЙ МИЛК” КОМПАНИ 42.6 ТЭРБУМ төгрөгийн зээл авсан. Тус компани 2017 онд хөдөө хуурай сүүний 60 үйлдвэр барина хэмээн зээл авчээ. Гэвч ердөө 2.4 тэрбум төгрөгийн зээл эргүүлэн төлж, одоо 50 тэрбум төгрөгийг эргүүлэн төлөх ёстой. Тэд зээл авахдаа нийт 62 тэрбум төгрөгийн үнэ бүхий барьцаа үлдээжээ.
Тус компанийн эсрэг гаргасан нэхэмжлэлийг Сүхбаатар дүүргийн Иргэний хэргийн анхан шатны шүүх хянаж байна. “Монгол драй милк” компанийн зээл төлөлт 40 сараар хугацаа хэтэрчээ. 2019 онд шүүхэд хэргийг шилжүүлсэн ч 11 удаа шүүх хурал хойшилж, хэрэг хоёр жилийн турш сунжирч байгаа юм. Дараагийн шүүх хурлын товч гараагүй байна.
5. “БЭРЭН” ГРУПП 33.2 ТЭРБУМ төгрөгийн зээл авсан. 720 болон 120 айлын “Ё” блок орон сууцны хороолол барихаар авсан зээлээс 3.2 тэрбум төгрөг төлсөн. Зээлийн нийт үлдэгдэл 43 тэрбум төгрөг болжээ.
Хан-Уул дүүргийн Иргэний хэргийн анхан шатны шүүх энэ сарын 14-нд болж, шүүхийн шийдвэрийг хүлээж байна.
6. “МОНГОЛ МАХ ЭКСПО”, “БИШРЭЛТ ПРОПЕРТИЗ”, “ВЕЛЛМАРТ” ХАМТРАН 31.9 ТЭРБУМ төгрөгийн зээл авсан. 8.4 тэрбум төгрөгийг эрүүлэн төлж, зээлийн үлдэгдэл 38.6 тэрбум төгрөг байна. Зээл төлөлт 31 сараар хойшилсон. 2019 онд СХД-ийн Иргэний хэргийн анхан, давж заалдах шатны шүүх хурлууд болсон. Дээд шүүхийн хурлыг товлоогүй байна.
7. “ЕНСАДА ИСТЕРН” КОМПАНИ 26.9 ТЭРБУМ төгрөгийн зээлийг экспортод чиглэсэн гурил, гурилан бүтээгдэхүүн үйлдвэрлэхээр авсан. Нэг ч төгрөг эргүүлэн төлөөгүй, зээлийн нийт үлдэгдэл 34 тэрбум төгрөг болжээ. Зээл төлөлт 22 сараар хойшилсон. Баянгол дүүргийн Иргэний хэргийн анхан шатны шүүх хэргийг хянаж байна.
8. “ЧИНГИС ХААН” БАНК 25 ТЭРБУМ төгрөгийг мөнгөн хадгаламж хэлбэрээр 2019 онд авсан. Зээлийн нийт үлдэгдэл 37.5 тэрбум төгрөгт хүрчээ. Зээл эргэн төлөлт 22 сараар хойшилсон тул 2020 онд Сүхбаатар дүүргийн Иргэний хэргийн анхан шатны шүүхэд хандсан байна.
Шүүх тус банкнаас 28.1 тэрбум төгрөг гаргуулах, 9.2 тэрбум төгрөгийн 27 ширхэг, барьцааны орон сууцны өмчлөгчөөр МУХБанкийг тогтоожээ. Гэвч Чингис хаан банкны гомдлоор шүүх хэлэлцсэн. Анхан шатны шүүх рүү буцаасан байна. Чингис хаан банкнаас хяналтын шатанд буюу Дээд шүүхэд гомдол гаргаснаар хэргийг 2021 онд анхан шатны шүүх рүү буцаасан.
9. ТӨРИЙН ОРОН СУУЦНЫ КОРПОРАЦ 2016 ОНД 19 ТЭРБУМ төгрөгийн зээлийг “Хөдөлгөөнт цогцолбор” төсөл хэрэгжүүлэхээр авсан. Зээлийн нийт үлдэгдэл 25 тэрбум төгрөгт хүрч, зээл төлөлт 64 сараар хойшилжээ. 2019 онд Чингэлтэй дүүргийн Иргэний хэргийн анхан шатны шүүхэд хандан, гурван шатны шүүх хурал болсон. Хариуцагч ТОСК-ийн зөвшөөрлийг баталж, хэргийг хэрэгсэхгүй болгох тухай захирамж гарч, шүүхийн маргаан дуусжээ.
10. “СОНГОУЛД”, “ӨРМӨН УУЛ ГРУПП” 17 ТЭРБУМ төгрөгийн зээлийг “Алт-2” хөтөлбөрт оролцохоор авсан. 2017 онд авсан ч зээлийн нийт үлдэгдэл 19 тэрбум төгрөгт хүрчээ. Зээлээ сүүлийн 43 сар төлөөгүй. Анхан болон давж заалдах шатны шүүх хурал болж, хамгийн сүүлд гомдлын зарим хэсгийг хангаж, анхан шатны шүүхийн шийдвэрт өөрчлөлт оруулжээ. Дээд шүүхээс энэ хэргийг хэлэлцэх, эсэх шийдвэрийг хүлээж байна.
“Буман залуус”11. “ПИРАМИД ОРД” КОМПАНИ 15 ТЭРБУМ төгрөгийн зээлийг “Буман залуус 296 айлын орон сууц” барихаар авсан.
Зээлийн нийт үлдэгдэл 23 тэрбум төгрөг болсон.
Хан-Уул дүүргийн Иргэний хэргийн анхан шатны шүүхийн шийдвэрийг хүлээж байна.
12. “БАРМОН” 13.8 ТЭРБУМ төгрөгийн зээл авсан. Зээлийн нийт үлдэгдэл 17 тэрбум болж, 54 сарын турш зээлээ төлөөгүй. Сонгинохайрхан дүүргийн Иргэний хэргийн анхан шатны шүүх шүүгч томилоогүй байна.
13. “МОНДУЛААН ТРЕЙД” КОМПАНИ 13 ТЭРБУМ төгрөгийн зээл авсан.
3.3 тэрбум төгрөгийн зээл төлж, зээлийн нийт үлдэгдэл 17.7 тэрбум төгрөг байна.
Сүхбаатар дүүргийн Иргэний хэргийн анхан шатны шүүхэд эхний хурал болж, шүүхийн шийдвэрийг хүлээж байна.
14. ЧИНГИС ХААН БАНК 13 ТЭРБУМ төгрөгийн зээлийг Арьс шир боловсруулах төсөлд дамжуулан олгосон. Зээлийн үлдэгдэл 1.1 тэрбум төгрөг. 2021 онд Давж заалдах шатны шүүх Чингис хаан банкны гомдлыг хэлэлцээд анхан шатны шүүх рүү буцаасан ч тус банкнаас хяналтын шатанд гомдол гаргаж, Дээд шүүх анхан шатны шүүх рүү буцаажээ.
15. “МБҮ ТРЕЙД” КОМПАНИ 11.5 ТЭРБУМ төгрөгийн зээл авсан. Зээлийн нийт үлдэгдэл 16.7 тэрбум төгрөг болж, 55 сараар зээл төлөлт хойшилсон. Хан-Уул дүүргийн Иргэний хэргийн анхан шатны шүүх рүү хэргийг шилжүүлсэн.
16. “ЗЭСТ-ӨНДӨР” КОМПАНИ 10.8 ТЭРБУМ төгрөгийн зээл авсан. Ширэн-Овоо төмрийн хүдрийн ордыг ил уурхайн аргаар ашиглах төсөл хэрэгжүүлэхээр авсан зээлийн нийт үлдэгдэл 11.8 тэрбум төгрөг болжээ. Сүүлийн 28 сард зээлээ эргүүлэн төлөөгүй. Нийслэлийн Иргэний хэргийн давж заалдах шатны шүүхээс Анхан шатны шүүхийн шийдвэрийг хүчингүй болгож, дахин шийдвэрлүүлэхээр буцаасан. Дараа нь хоёр тал буюу “Зэст-Өндөр” ХХК болон Банк тус тус Дээд шүүхэд гомдол гаргажээ. Дээд Шүүхийн шүүх хурал хүлээгдэж байна.
Тус компани Дорнод аймгийн Халхгол сумын нутаг Ширэн-овоо хэмээх газарт 583.83 гектар талбай бүхий ашигт малтмал ашиглалтын талбайг эзэмшдэг. 2014 оноос үйл ажиллагаа явуулж, 2015 оны эхний хагас жилд баяжуулах үйлдвэр ашиглалтад оруулсан. Урьдчилсан тооцоогоор баяжуулах үйлдвэрээс жилд 500 мянган тонн, цаашид хүчин чадлаа 2-3 дахин нэмж, төмрийн өндөр агуулгат баяжмал боловсруулж, экспортод гаргахаар төлөвлөжээ. “Заг” групп энэ компанийн хөрөнгө оруулагч юм.
17. “МОНГЕМА” КОМПАНИ 10 ТЭРБУМ төгрөгийн зээлийг муур, нохойн хоол үйлдвэрлэхээр авчээ. Тус компанийн зээлийн нийт үлдэгдэл 12 тэрбум төгрөг болсон. Тэд зээл авахдаа 10.5 тэрбум төгрөгийн барьцаа хөрөнгө үлдээсэн, зээл төлөлт 38 сараар хоцорсон тул яг нэг жилийн өмнө Сүхбаатар дүүргийн Иргэний хэргийн анхан шатны шүүхэд нэхэмжлэл гаргажээ. Шүүх хурлыг огт зарлаагүй байна.
18. “МОНГОЛ ЭМ ИМПЕКС КОНЦЕРН”, “БИШРЭЛТ ГРУПП” 7.2 ТЭРБУМ Төгрөгийн зээлийг 2018 онд авсан. 5.5 тэрбум төгрөгийг эргүүлэн төлж, зээлийн үлдэгдэл 4.9 тэрбум төгрөг болжээ.
Зээл төлөлт 31 сараар хойшилсон тул 2019 онд Сүхбаатар дүүргийн Иргэний хэргийн анхан шатны шүүхэд хандаж, давж заалдах шатны шүүхийн шийдвэр гарч, 6.9 тэрбум төгрөгийг тус компаниас гаргуулахаар шийджээ. Дээд шүүхийн хуралдааны тов гараагүй байна.
19. “ГАН ХҮДЭР ОРД” КОМПАНИ 5.9 ТЭРБУМ төгрөгийн зээлийг хорголжин төмрийн хүдрийн үйлдвэр барихаар авчээ. Зээлээс 1.2 тэрбум төгрөг төлж, үлдэгдэл нь 5.6 тэрбум төгрөг байна. Зээл төлөлт 21 сараар хойшилсон. Шүүхийн шийдвэрийг Дарханы ШШГГ 445-р хорих ангид гүйцэтгэсэн.
20. “ИНЖИР” КОМПАНИ 5.6 ТЭРБУМ ТӨГРӨГИЙН зээлийг экспортын наамал дүнз үйлдвэрлэх, евро стандартын угсармал, модон байшин барихаар 2018 онд авчээ. Зээлийн нийт төлбөр 7.6 тэрбум төгрөг болсон. бодит, гэрчилгээтэй болон биет бус ирээдүйд үүсэх мөнгөн хөрөнгийг оруулж, нийт 5.7 тэрбум төгрөгийн барьцааг Хөгжлийн банкаар үнэлүүлсэн. Зээл төлөлт нь 42 сараар хоцорсон тул өнгөрсөн сард Сүхбаатар дүүргийн Иргэний хэргийн анхан шатны шүүхэд хэргийг шилжүүлсэн. Одоогоор нэхэмжлэлийг гардуулаагүй байна.
21. “МОНЛАА” 5.6 ТЭРБУМ ТӨГРӨГИЙН зээлийг төмрийн хүдрийг нойтон аргаар боловсруулах төсөл хэрэгжүүлэхээр авчээ. Зээлийн нийт үлдэгдэл 7.6 тэрбум төгрөг болсон. Сүүлийн 74 сард зээлийн эргэн төлөлт хийгээгүй. 2019 онд анхан шатны шүүхийн шийдвэр гарч, дуудлага худалдаа зохион байгуулагдаж байна. Барьцаа хөрөнгийн шинжээчийн үнэлгээ хийж, дуудлага худалдаа эхэлнэ. Тус компанийн барьцаа хөрөнгийг 6.3 тэрбум төгрөгөөр үнэлжээ.
22. “СЭЛЭНГИЙН ГЕРЕФОРД” КОМПАНИ 4.1 ТЭРБУМ төгрөгийн зээл авсан. Зээлийн нийт үлдэгдэл 5.4 тэрбум төгрөг болж, 72 сар зээлээ төлөөгүй. Сэлэнгэ аймаг дахь сум дундын Иргэний хэргийн анхан шатны шүүхэд хэргийг шилжүүлж, шүүгч томилоогүй байна.
23. “БОЛОР ШҮР” КОМПАНИ 2.3 ТЭРБУМ төгрөгийн зээлийг “Алт-2” хөтөлбөрт орохоор авсан. Зээлийн нийт үлдэгдэл 2.4 тэрбум төгрөг болсон. Энэ маргаантай холбоотойгоор долоон удаагийн шүүх хурал 2018 оноос хойш болжээ. Тус компанийн хөрөнгийг дуудлага худалдаанд оруулах шийдвэр гарсан байна.
24. “ДЭД БҮТЭЦ ИНЖЕНЕРИНГ” КОМПАНИ 2.1 ТЭРБУМ төгрөгийн зээл авсан. Одоо зээлийн нийт үлдэгдэл 2.8 тэрбум байна. Зээл төлөлт 34 сар хойшилсон. Сүхбаатар дүүргийн Иргэний хэргийн анхан шатны шүүхэд эхний хурал болжээ.
25. “ЭРД ХУЛ” КОМПАНИ 0.7 ТЭРБУМ төгрөгийн зээл авсан. 0.3 тэрбум төгрөг төлж, зээлийн үлдэгдэл 0.6 тэрбум төгрөг байна. Сүүлийн 43 сар зээлээ төлөөгүй. 2019 онд анхан шатны шүүхийн шийдвэр гарч, дуудлага худалдаа зохион байгуулах болсон.
Дээрх чанаргүй зээлийн нийт дүн 880 тэрбум төгрөг байна. Гэвч компаниудын бодит буюу гэрчилгээтэй барьцаа хөрөнгө 323 тэрбум төгрөг байгаа юм. Одоогоор Хөгжлийн банк шүүхээс нийт 841 тэрбум төгрөгийн нэхэмжлэхийн шаардлага гаргажээ.
Хөгжлийн банк арилжааны банкуудтай харьцуулахад бага хүүтэй зээл олгодог. Гэвч нийт багцын
- 55 хувь чанаргүй,
- 38 хувь нь хэвийн,
- 6.5 хувь нь анхаарал хандуулах хэмжээнд байна.
Дээрх чанаргүй зээлүүдийг эргэн төлүүлж чадахгүй бол банкны харьцаа үзүүлэлтүүд алдагдах, эх үүсвэрийг буцаан татах, нэмж эх үүсвэр татах боломжгүй болох, цаашид зээл олгож чадахгүйд хүрнэ.
Хөгжлийн банкийг цаашид Экзим банкны зарчмаар ажиллуулах Засгийн газрын шийдвэр өнгөрсөн онд гарсан. Ингэснээр тус банк арилжааны банкуудтай өрсөлдөхгүй. Экспортыг өсгөхийн тулд бусад банктай хамтран хамтын санхүүжилт олгох юм. Мөн мах, ноос, ноолуур гэх мэт экспортын бүтээгдэхүүний нийлүүлэлтийн шугамын чухам хаана нь гацаа үүсэж байгааг илрүүлэхэд анхаарч ажиллана гэв. Жишээ нь махны экспортыг нэмэхэд вакцинжуулалт, лаборатори, тээвэрлэлт гацаа үүсгэж байвал эдгээрийг шийдвэрлэх төслийг санхүүжүүлнэ. Барилгын салбарын тухайд арматур, цонх, шилээ импортолдог тул эдгээрийг дотоодод үйлдвэрлэх төслүүдийг дэмжих бодлого баримтална гэж Н.Мандуул захирал танилцуулсан юм.
Хүснэгт. Хөгжлийн банкны чанаргүй зээлээр зарлагдсан компаниуд ба эзэд
| Компани | Зээлийн өр төлбөр /тэрбум төг., хуримтлагдсан дүн/ | Эзэмшигчид | |
|---|---|---|---|
| 1 | “Монгол драй милк” ХХК (Хөдөө орон нутгуудад 60 ширхэг хуурай сүүний үйлдвэр) |
50.4 | Анхны эзэмшигч – Энхболд Эрдэнэбилэг, Шинэ эзэмшигч – Лувсан Ганцэцэг (2022.01.05) |
| 2 | “Монгема” ХХК (Муур нохойн хоол үйлдвэрлэх тоног төхөөрөмж авах, Япон болон бусад улсад экспортлох ) |
12.6 | Дамбал Лхагвадорж |
| 3 | “Эрэл” ХХК (Угсармал орон сууц) |
163.1 | Даваахүү Сэргэлэн |
| 4 | “Инжир” ХХК (Экспортын наамал дүнз, евро стандартын угсармал модон барилга төсөл) |
7.6 | Баточир Батбаатар Гүүгэр Бямбажав Баатаржав Золбаяр Чулуундорж Өлзий |
| 5 | “Чингис хаан банк” ХХК (Мөнгөн хадгаламж) |
37.5 | Ньюстандарт Финанс – Дашцэрэн Батаа – Шүхэрт Бүтэд – Цэдэниш Баярсайхан |
| 6 | “Чингис хаан банк” ХХК (Дамжуулан зээл – Арьс шир боловсруулах, үйлдвэрлэлийн төсөл) |
1.1 | |
| 7 | “Төрийн орон сууцны корпораци” ТӨХХК, “Нью яармаг хаусинг прожект” ХХК нар. (“Шинэ яармаг” орон сууцны хороолол барих төсөл) |
117.9 | Юнайтэдпрожектс групп – Цогтжаргал Ууганбаяр |
| 8 | ТОСК-“Хөдөлгөөнт цогцолбор” төсөл | 25.6 | |
| 9 | “Монгол эм импекс концерн” ХХК, “Бишрэлт групп” ХХК нар. (Хатуу тунгагдсан эм болон дуслын шингэний үйлдвэр байгуулах төсөл) |
4.9 | Батбаяр Болормаа, Бишрэлт Групп, Ариунболд Чинсанаа, Ариунболд Чинбишрэлт |
| 10 | “Монгол мах экспо” ХХК, “Бишрэлт пропертиз” ХХК, “Веллмарт” ХХК нар (Мах боловсруулах цогцолбор төв байгуулах төсөл) |
38.6 | Ариунболд Чинбишрэлт |
| 11 | “Сонгоулд” ХХК “Өрмөн Уул групп” ХХК (Алт-2 үндэсний хөтөлбөр) |
19.7 | Сэрод Дуламжав Дашдорж Оюунбилэг |
| 12 | “Зэст-Өндөр” ХХК (Ширэн-Овоо төмрийн хүдрийн ордыг ил уурхайн аргаар ашиглах төсөл) |
11.8 | Начу (Хуулийн этгээд) Долгормаа Тамир 2013.10.24 Долгормаа Тана 2013.10.24 Сутайресурс (Хуулийн этгээд) Балхүү Ганзориг |
| 13 | “Кью Эс Си” ХХК (33.4 км төмөр зам барих ажилд шаардагдах санхүүжилт) |
212.4 | Куалитистийл Корпорэйшн (Британийн виржини арлууд – Quality Steel Corp) |
| 14 | “Енсада истерн” ХХК (Экспортод чиглэсэн гурил, гурилан бүтээгдэхүүний үйлдвэр төсөл) |
34.3 | Өсөх Болдсайхан |
| 15 | “Болор шүр” ХХК (Алт-2 үндэсний хөтөлбөр) |
2.4 | Цогбаатар Содхүү |
| 16 | “Эрд хул” ХХК (Алт-2 үндэсний хөтөлбөр) |
0.6 | Доржсүрэнхорлоо Мөнхбаатар |
| 17 | “Монлаа” ХХК (Төмрийн хүдрийг нойтон аргаар боловсруулах үйлдвэр барих) |
7.6 | Нанзад Болдхүү Хишигжаргал Энхсайхан Мөнхжаргал Ганбагана |
| 18 | “Ган Хүдэр Орд” ХХК (Хорголжин төмрийн хүдрийн үйлдвэр барих төсөл) |
5.6 | Должинсүрэн Мандахбаяр |
| 19 | “Дэд бүтэц инженеринг” ХХК (Дэд бүтэц-Ухаалаг шийдэл төсөл) |
2.8 | Мягмар Одончимэг Цэвээночир Насанбат |
| 20 | Бэрэн групп ХХК (Улаанбаатар хот, Сүхбаатар дүүргийн 7-р хорооллын 720 болон 120 айлын “Ё” блок орон сууцны хороолол) |
43.7 | Бэрэнбарал Мөнхтөр Цэдэнсодном Батболд Ганзориг Баттулга Ганзориг Энхболд Цэдэнсодном Батэрдэнэ Цэдэнсодном Батбаяр Бэрэнбарал Сономсүрэн Бэрэнбарал Сарангэрэл Бэрэнбарал Чимгээ Бэрэнбарал Мөнхдалай Бэрэнбарал Ганбат |
| 22 | Мондулаан трейд ХХК (Баянголын ам дахь Зүүн шанд, Улааншивэртийн амны алтны шороон ордыг ашиглах төсөл) |
17.7 | Нүүдэлчингрупп Шийрэв Мөнхнаст Миеэжав Нямбаатар Цэдэниш Баярсайхан |
| 23 | Пирамид Орд ХХК (“Буман залуус 296 айлын орон сууц”-ны төсөл) |
23.1 | Гомбо Цолмон |
| 24 | МБҮ трейд ХХК (“Мал нядалж, мах бэлтгэх үйлдвэр”, “Малын худалдааны төвлөрсөн зах” төсөл) |
16.7 | Базар Эрдэнэбаяр Хотол Түмэн (Хуулийн этгээд) Сэнгээ Бямбасүрэн Лхагвасүрэн Одхүү Чойжилсүрэн Хүрэлолдох |
| 25 | Сэлэнгийн герефорд ХХК (“Мах бэлтгэлийн кластерын хүчин чадлыг нэмэгдүүлэх төсөл”) |
5.4 | Лханаажав Баянбаатар |
| 26 | Бармон ХХК (Гэр хорооллын дахин төлөвлөлтийн хүрээнд ЧД-ийн 10-р хорооны нутаг дэвсгэр, Дэнжийн 1000 орчимд 468 айлын 4 блок “Шинэчлэл хороолол” орон сууцны барилгын төсөл) |
17 | Шагдаррагчаа Үнэнбат Шагдаррагчаа Төгсбат Шагдаррагчаа Эрдэнэбат Шагдаррагчаа Батцэцэг Банзрагч Бурмаа Ламжав Шагдаррагчаа Шагдаррагчаа Ариунбат |