Өнгөрөгч Баасан гарагт Мьянмарын төв хэсэгт болсон 7.7 магнитудын хүчтэй газар хөдлөлт болсоны улмаас амиа алдсан хүний тоо 3000 даваад байна.
Албан ёсны мэдээллээр газар хөдлөлтийн улмаас амиа алдсан хүний тоо 3003 болж, 4515 хүн гэмтэж бэртсэн байна. Одоогоор 351 хүн ор сураггүй алга болоод байна.
Мьянмарын цэргийн удирдагч Мин Аун Хлайн өнөөдөр Таиландын нийслэл Бангкок хотод болж буй бүс нутгийн улс орнуудын удирдагчдын уулзалт буюу Бенгалын булангийн эрэг орчмын долоон улсын төр засгийн тэргүүнүүдийн уулзалтад оролцож, Мьянмарт хүмүүнлэгийн болон гамшгийн дараах сэргээн босголт хийхэд санхүүгийн болон бусад дэмжлэг үзүүлэхийг уриалж байгаа мөн хэвлэлүүд мэдээлжээ.
2021 онд Мьянмарт болсон төрийн эргэлтээс хойш Өрнөдийн хориг арга хэмжээнд орсон Мьянмарын төр засгийн удирдлагууд болон цэргийнхэн, ялангуяа Хунтын дэглэмийн удирдагч Мин Аун Хлайн олон улсын арга хэмжээнд барагтай бол ордоггүй байсан. Харин улс оронд нь учирсан байгалийн гамшгийн улмаас ийнхүү Таиландыг зорьсон байна.
Газар хөдлөлтийн гамшиг улс орон даяар асар хэмжээний хохирол учруулсан тул Мьянмарын эрх баригч цэргийнхэн өчигдөрөөс эхэлж дөрөвдүгээр сарын 22 нийг хүртэл хугацаанд Мьянмарын ардчиллыг дэмжигч хүчнүүд болон үндэстний цөөнхийн эсрэг түр хугацаанд гал зогсоох шийдвэр гаргажээ. Магадгүй энэ шийдвэр нь олон улсаас тусламж дэмжлэг авах гэсэн Мьянмарын эрх баригчдын үйлдэл гэж харж болох юм аа.
Эх сурвалж: https://www3.nhk.or.jp/nhkworld/en/news/20250403_04/