БНСУ-ын Ерөнхийлөгч Юн Сок Ёлийг огцруулахтай холбоотой асуудлаар шүүхийн шийдвэр гарах өдөр товлогдсон учраас тус улсын цагдаагийн байгууллагаас Үндсэн хуулийн шүүхийн ойролцоо эмх замбараагүй байдал үүсэхээс урьдчилан сэргийлэх арга хэмжээ авч, хамгаалалтыг чангаруулж эхлээд байна. Тухайлбал энэ Баасан гаригт буюу дөрөвдүгээр сарын 4-ний өдөр Ерөнхийлөгчийг огцруулах шийдвэр гарахаар товлогдсон.
Иймд цагдаа нар Үндсэн хуулийн шүүхийн эргэн тойронд 100 метрийн радиусыг хамарсан талбайг хамгаалалтад авч, хамгаалалтад авсан энэ бүсэд жагсаал цуглаан хийхийг хориглож, олон нийтийг нэвтрүүлэхгүй байх, замын хөдөлгөөнийг зогсоохоор болжээ.
Иймд Цагдаа нар ирэх өдрүүдэд болох жагсаал цуглааныг сайтар хянаж, хамгаалалтаа чангатгаж байгаа гэдгийг мэдээлээд ялангуяа шүүхийн шийдвэр гарах Баасан гаригт Үндсэн хуулийн шүүх болон Ерөнхийлөгчийн ордны ойр орчмын олон нийт ихээр цуглардаг газрууд болон сургуулиудыг үйл ажиллагаа явуулахыг нь зогсоож, хаахаас гадна Сөүлийн метрог бүрэн зогсоох талаар мэдээлэл гарсан байна. Тухайлбал Сөүл хотын Боловсролын газраас мэдээлснээр Үндсэн хуулийн шүүх болон Сөүл хотын Ёнсан дахь ерөнхийлөгчийн ордны ойролцоох нийт 13 сургуулийг Баасан гаригт хаахаар болжээ.
Мөн цагдаагийн байгууллага Үндсэн хуулийн цэцийн бүх шүүгчийн орон байрыг бүрэн хамгаалалтад авчээ.
Нөхцөл байдалтай уялдуулж улс орон даяар 20 мянга орчим цагдаагийн албан хаагчдыг дайчилж байгаа бөгөөд тэдгээрийн 70 хувь нь буюу 14 мянга орчим цагдаагийн бие бүрэлдэхүүн Сөүл хотод ажиллана гэдгийг холбогдох албаныхан мэдээлжээ.
Эх сурвалж: